NeckCare

Við höfum unnið náið með NeckCare að þróun nýs stafræns kerfis sem ætlað er að hjálpa fólki að bæta hálshreyfingar og stjórn með sérhönnuðum prófum og æfingum. Kerfið hentar fjölbreyttum hópi notenda, allt frá þeim sem eru að jafna sig eftir höfuðáverka eða hálshnykk, til einstaklinga með hálsverki, íþróttafólks og fleiri. Megináherslan var lögð á að innleiða nokkur lykilpróf í kerfinu. Við unnum að þróun á svokölluðu fiðrildaprófi (e. butterfly test), sem metur hreyfingar höfuðsins eftir fyrirfram ákveðinni leið, hreyfisvið-próf (e. range of motion test) sem mælir hreyfigetu hálsins í ýmsum áttum, og liðstöðuvillu-próf (e. joint position error test) sem metur nákvæmni þess að snúa aftur í upphaflega hálsstöðu. Einnig var bætt við mati á einkennum notenda. Við unnum að virkni sem gerir kleift að útbúa ítarlegar og auðskiljanlegar skýrslur eftir hvert próf. Þessi sjónrænu gögn auðvelda heilbrigðisstarfsfólki að fylgjast með framförum sjúklinga yfir tíma. Þá var bætt við möguleika fyrir heilbrigðisstarfsfólk til að deila skýrslum á öruggan hátt á netinu, spila prófið og sjá það gerast aftur og hlaða niður PDF-skjölum af skýrslunum. Að lokum var unnið að æfingahluta til að hjálpa sjúklingum að bæta árangur sinn í prófunum. Þetta heildstæða kerfi auðveldar bæði heilbrigðisstarfsfólki og sjúklingum að vinna saman að meðferð og bata.

Þróun prófanna var flókin, enda þurftu þau að vera í fullkomnu samræmi við rannsóknir og regluverk NeckCare. Það er vert að nefna að kerfi NeckCare byggja á tveggja áratuga vísindalegum rannsóknum. Sömu nákvæmni var krafist við gerð skýrslna og greininga til að tryggja réttar niðurstöður og skýra framsetningu gagna. Eitt af því sem við þurftum að takast á við í verkefninu var að tengja við sérstakan hreyfiskynjara, sem reyndist vera töluverð áskorun. Stærsta vandamálið sem við rákumst á var svokallað skynjararek (e. drift), en okkur tókst að leysa það með því að fínstilla kvörðunarferlið (e. calibration process). Til að einfalda þróunarferlið bjuggum við til hermunartækni sem gerði okkur kleift að vinna óháð beintengingu við skynjarann. Þetta flýtti fyrir þróun frumgerða og prófana. Auk þess gátum við þróað skýrslur og aðra virkni mun hraðar og skilvirkara en ella.

Verkefnið gekk vonum framar. Allir viðskiptavinir NeckCare hafa innleitt nýja kerfið og njóta nú góðs af auknum möguleikum þess og mun betri notendaupplifun. Þótt NeckCare státi mörgum virtum viðskiptavinum sem gaman væri að nefna, virðum við trúnað þeirra og látum það ógert. Við erum afar þakklát fyrir að hafa fengið tækifæri til að taka þátt í verkefni sem hefur svo mikil áhrif á líf fólks. Sérstaklega ánægjulegt hefur verið að heyra hversu vel sjúklingar taka lausninni; margir segja hana hafa gjörbreytt endurhæfingarferli sínu til mikilla bóta. NeckCare reyndist vera frábær samstarfsaðili í gegnum allt ferlið. Við mynduðum ekki einungis sterk fagleg tengsl við teymið þeirra heldur eignuðumst einnig góða vini. Í ljósi þessa farsæla samstarfs og góða árangurs vonumst við til að fá fleiri tækifæri til að starfa með þessu hæfileikaríka fólki á ný, hvort sem það verður undir merkjum NeckCare eða á öðrum vettvangi. Það var okkur mikill heiður og viðurkenning þegar nöfn teymismeðlima okkar voru skráð á eitt af einkaleyfisskjölum NeckCare. Þetta undirstrikar enn frekar mikilvægi framlags okkar til verkefnisins. Slík viðurkenning hvetur okkur til að halda áfram að leggja okkur fram af heilum hug í öllum okkar verkefnum.